Murinjo, tifoz i shqiptarit Fabio Hoxha
Sulmuesi i Interit U-17: “Pata emocione të mëdha kur më takoi”. 16-vjeçari me 16 gola është shënuesi më i mirë i zikaltërve
Dash Frashëri- “Special One”, trajneri karizmatik i Interit, Hoze Murinjo, është tifoz i një talenti shqiptar, Fabio Hoxhës, goleadorit më të mirë të Interit U-17, apo “Allievi Nazionali” siç njihet në Itali.
“Murinjo më hodhi dorën në qafë dhe më tha disa herë ‘bravo’, duke më shtrënguar miqësisht e më rrahur te supet. Ishte vërtet një emocion i madh, pasi gjestin e bëri gjatë një minindeshje në stërvitjen e ekipit tonë dhe, që ishte pak ditë pas fitores 7-0 me Pizigetonen, ku unë shënova tre gola dhe dhashë dy asistë”- tregon për Albania-sport.com, Fabio Hoxha, autori i 16 golave me fanellën zikaltër në kampionatin e moshave.
Hoxha është shndërruar në një “killer” i kundërshtarëve. Gjashtë gola në tri ndeshjet e fundit, një numër i pafund asistësh, e kanë çuar emrin e tij në bllokun e shënimeve të trajnerit portugez. Murinjo, një ditë përpara ndeshjes kundër Mançesterit, pohoi se te ekipet e moshave të Interit kishte parë të rinj të talentuar, duke përmendur ekipin U-17 zikaltër.
Talenti shqiptar 16-vjeçar, për të cilin klubi i Interit paguan një rrogë mujore prej 600 eurosh, ka shënuar 16 nga 103 golat e realizuar nga zikaltërit në 23 ndeshjet pa asnjë humbje (69 pikë). Në “Allievi Nazionali” marrin pjesë 17 skuadra, midis tyre edhe Milani, Atalanta, Breshia.
“Dy golat e fundit i shënova në fitoren 5-1 kundër Pavias. Edhe në takimin e parë të fituar në transfertë 6-0, kisha shënuar një gol kundër tyre”, - tha përmes komunikimit elektronik Hoxha, i cili ka tërhequr vëmendjen e skuadrave të mëdha britanike, veçanërisht Çelsit e Arsenalit. Fakt që e dinë edhe drejtuesit më të lartë të klubit të presidentit Masimo Morati.
Të gjithë specialistët e moshave te Interi e vlerësojnë gati si një fenomen shqiptarin e vogël. “Në ekip kam disa lojtarë të mirë, por mbi të gjithë dua të veçoj Oksën (Hoxhën), sulmuesin shqiptar”, - tha gjatë një interviste për Inter Channel, trajneri i Interit U-17, Paolo Tomasoni, i ftuar për të diskutuar në studiot e televizionit tematik zikaltër pas fitores 5-1 me Pavian.
Fabio Hoxha, idhulli i të cilit është lojtari më i paguar në botë, Zlatan Ibrahimoviç, vlerësohet për përdorimin e mirë të dy këmbëve, dhe për më tepër është një njohës i mirë i portës.
Gjatë një sezoni kur luante me Piacencën U-15 (2004-2005)- përpara se të blihej nga Interi për 40 mijë euro (atëherë vetëm 14 vjeç)- Fabio Hoxha shënoi 22 gola. Piaçenca në atë kohë drejtohej nga Masimo De Paoli, trajneri që zbuloi e rriti Andrea yllin aktual të Milanit, Andrea Pirlo.
“Objektivi im për këtë sezon është të shënoj më shumë se 22 gola dhe me tetë ndeshjet që na kanë mbetur deri tani, besoj se mund ta realizoj këtë synim”, - tha Fabio, i cili luan prej prej 5 vjet e gjysmë futboll në Itali, duke e nisur karrierën e tij simpatike me Firenzuola, skuadër nga e cila ka dalë edhe Luka Toni.
Shqipëria U-19 për fazën e grupeve paraeliminatore të Kampionatit Europian U-19 për sezonin 2009-2010 do të përballen me Italinë, Irlandën e San Marinon. Ndeshjet do te zhvillohen nga data 13-18 nëntor 2009 në San Marino.
“Një ftesë për në Kombëtare i bën nder cilitdo lojtar. Natyrisht, që të ndeshem me shokët e mi kundër Italisë, ku banoj e luaj aktualisht, dhe t’u shënoja gol asaj do të ishte kënaqësi e madhe”, - përfundon Hoxha, i cili mbush 17-vjeç më 7 maj dhe ka marrë pjesë më parë në testimet që Shqipëria U-17 zhvilloi në Tiranë nga data 7-9 janar 2008, ku shënoi edhe golin e fitores 1-0 të ndeshjes brenda grupit të vogël kuqezi.
FABIO HOXHA
Datëlindja: 07.05.1993
Kombësia: Shqiptare
Gjatësia: 1.76 m
Pesha: 64 kg
Roli: Sulmues
Skuadra: Inter U-17
16 gola
Fabio Hoxha ka shënuar deri tani 16 gola për Interin në kampionatin “Allievi Nazionali”. Sipas faqes zyrtare inter.it, ai është shënuesi më i mirë, ndërsa pas tij me nga 13 gola vijnë Kokuca e Mela.
Ibrahimoviç
Ylli suedez i Interit, Zlatan Ibrahimoviç, është edhe idhulli i sulmuesit 16-vjeçar shqiptar. Hoxha e admiron atë, madje në shtëpi ka dhe një fanellë të firmosur nga lojtari më i paguar në botë.
E Premte, 27 Shkurt 2009 Albania-sport
