Eksperienca dhe suksesi, “jetike” për Bajernin
Karl-Hajnc Rumenige: Për të zëvendësuar Klinsmanin na duhet dikush me eksperiencë në fitimin e trofeve
Bajerni i Mynihut vazhdon “gjuetinë” për trajnerin që do të marrë vendin e të shkarkuarit Jurgen Klinsman. Eksperinca dhe personaliteti fitues janë cilësitë kryesore që duhen të kenë kandidatët, sipas drejtuesit të lartë bavarez, Karl-Hajnc Rumenige.
“Kur hedh sytë nëpër Europë, vihet re se shumë nga trajnerët e sukseshshëm janë personalite me një eksperiencë të jashtëzakonshme dhe fitojnë trofe vit pas viti. Ne kërkojmë një njeri të tillë” - tha Rumenige për “Die Velt”. Klinsman u shkarkua të hënën e kaluar, pas dhjetë muajsh në Mynih, për shkak të rezultateve të dobta.
Deri në fund të kampionatit, ekipi do të drejtohet nga 63-vjeçari Jup Hejnkes. Pesë janë emrat më të përfolur për të marrë drejtimin e kampionëve të Gjermanisë. Tre holandezët Luis Van Gal, Frenk Rajkard dhe Martin Jol, janë lakuar krahas Roberto Mançinit dhe drejtuesit të Federatës Gjermane të Futbollit, Matias Samer.
“Trajneri do të marrim do të jetë me eksperiencë dhe i sukseshëm. Duam që skuadra të zhvillohet prej tij dhe jo ai prej skuadrës” - vazhdoi Rumenige, i cili kërkon menjëherë trofetë. “Në të gjithë Europën, te Real Madridi ose te Barcelona, në ekipet e mëdha në Itali apo Angli, klubet nuk kanë kohë të mjaftueshme për trajnerët. Askush nuk mund t’i japë tri-katër vite kohë dikujt që të injektojë idetë e reja në skuadër.
Tre vite pa trofe janë shkatrrimtarë pavarësisht se projekti mund të jetë i shkëlqyer, si në rastin tonë me Klinsmanin. Aktualisht duam një trajner që të na rikthejë te kupat që në sezonin e ardhshëm. Kemi një skuadër që fitoi titullin me 10 pikë avantazh dhe Kupën e Gjermanisë. Përbërja është cilësore, por na duhet një dirigjent”.
Kur kanë mbetur edhe katër ndeshje nga fundi i kampionatit, Bajerni renditet në vendin e dytë të Bundesligës me tri pikë disavantazh ndaj Volfsburgut kryesues. Rumenige pranon se tifozët e Bajernit filluan të silleshin ashpër me Klinsmanin, pasi nuk ia kishin falur zgjedhjen e tij në botërorin 2005. “Klinsi”, që drejtonte Gjermaninë, ia besoi portën Jens Lehmanit, duke lënë në stol benjamin e bavarezëve Oliver Kahan.
“Ajo që nënvlerësuam në momentin e firmës me Klinsmanin ishte fakti se tifozeria kishte zgjedhur të mbante anën e Kahnit në botëror dhe nuk kishte kthim prapa, - tha Rumenige. - Që në vështirësitë e para që skuadra pati, tifozët dolën kundra trajnerit. Kjo ia vështirësoi punën. Unë shpresoja që të bënin paqe, por kjo nuk ndodhi kurrë”.
Bundesliga
Herta mbron vendin e tretë në Hamburg
Herta e Berlinit ka barazuar 1-1 në Hamburg, duke ruajtur vendin e tretë në Bundesligë, i fundit i disponueshëm për në Ligën e Kampioneve. Kryeqytetasit barazuan me golin nga distanca të mesfushorit serb Gojko Kaçar, pasi Hamburgu kishte kaluan në avantazh, pas vetëm tetë minutash lojë. Volfsburgu kryeson me 60 pikë kur kanë mbetur katër javë nga fundi. Bajerni i vendit të dytë ka 57 pikë, ndërsa Herta ka 56, një më shumë se Hamburgu dhe Shtutgarti. Në ndeshjen tjetër, Këlni fitoi ndaj Verderit.
http://www.sportishqiptar.com.al/eksper ... -bajernin/
