Shkodra: Ne jemi shansi i kombëtares kuqezi
Çështja e ndeshjes së kombëtares shqiptare është tema e ditës në këtë qytet, që vazhdon të jetë hallemadh
23-03-2007 Shkodranët në vetvete janë pak lokalistë "të tërbuar". Çdo gjë e mirë e tyre reklamohet jo pak, prandaj prej 4 vitesh tifozët e këtij qyteti janë mburrur për shansin që ata i kanë dhënë Shqipërisë në përballjen e 29 marsit të 2003 shit ndaj Rusisë. "Loro Boriçi" konsiderohet shans për kuqezinjtë tanë dhe prandaj shpresohet që e njëjta gjë të ndodhë edhe me Slloveninë. Për më tepër tifoja e shkodranëve shtohet ngaqë në radhët e ekipit tonë kombëtar për këtë ndeshje janë edhe tre shkodranë: Elvin Beqiri, Hamdi Salihi dhe Xhevahir Sukaj. Për të parin kjo fushë ka qenë vërtet fatsjellëse, sepse ndaj rusëve ai bëri debutimin në formacionin e Brigelit dhe që atëherë nuk ka dalë më nga kjo kombëtare. Kështu mbase mund të ndodhë këtë radhë edhe me dy të tjerët. Besimi te fitorja në metropolin e veriut të Shqipërisë është jashtëzakonisht i madh. Ditët e fundit, atmosfera e këtij takimi ka filluar të ndihet edhe në bisedat e zakonshme të shkodranëve në kafene, rrugë apo kudo tjetër. Çështja e ndeshjes së kombëtares shqiptare është tema e ditës në këtë qytet, që vazhdon të jetë hallemadh, megjithëse dy vitet e fundit ka filluar të ndihet dora e investimeve në të. Madje këtë gjë do të kenë rastin "ta shijojnë" edhe sllovenët, teksa hyrja e qytetit është në rikonstruksion e sipër. Pavarësisht këtyre gjërave, në Shkodër të gjithë besojnë se ata janë shansi i kombëtares sonë.
Dje filloi shitja e biletave në Shkodër
Ndeshja e nesërme me Slloveninë po pritet me mjaft interes në Shkodër. Ashtu si dhe para katër vitesh ndaj Rusisë, edhe këtë radhë shpresohet që shkodranët të jenë këmbëmbarë për skuadrën kuqezi. Interesimi për biletat ka qenë i vazhdueshëm gjatë këtyre ditëve në qytetin më të madh verior të Shqipërisë. Ata kërkonin të kishin në dorë një biletë më shpejt sesa dita e ndeshjes dhe hedhja në treg e tyre që ditën e djeshme i ka kënaqur. Shitja e biletave ka filluar dje në drekë në këtë qytet. Ajo ka nisur në tri pika njëherazi, një në qendër të qytetit, pikërisht në Piacë, pranë hotelit "Colosseu" dhe dy të tjerat pranë stadiumit "Loro Boriçi". Deri në orën 12.00, kur nisi shitja e tyre tek kioskat përkatëse, shikohej herë pas here interesimi i tifozëve të ndryshëm. "Ka ditë që njerëzit vijnë e pyesin se kur do të fillojë shitja e biletave. Madje shumë prej tyre, duke dashur t'i kenë në dorë këto bileta, donin të më linin edhe "kaparin", por unë nuk jua kam marrë, sepse nuk doja të ngatërrohesha. Ma merr mendja se shitja e biletave do të jetë e shpejtë," thotë njëri prej njerëzve që është caktuar të merret me shitjen e biletave. Po ashtu, në zyrat e klubit të futbollit "Vllaznia" hyjnë e dalin vazhdimisht njerëz. Janë përfaqësues institucionesh, njerëz të thjeshtë dhe familje sportistësh, që duan të sigurojnë një biletë. Sekretari i klubit, Agim Medja, është lodhur jo pak këto ditë, duke i pritur dhe përcjellë ata. Përvoja e katër viteve më parë në prag të ndeshjes me Rusinë është ende e hidhur te shkodranët, teksa atëherë nuk pati pasur asnjë biletë në shitje deri ditën e ndeshjes, gjë e cila solli një rrëmujë të plotë. Pa thënë pastaj se biletat përfunduan në tregun e zi, ndërkohë që vetëm pak orë para ndeshjes ato filluan të shiten edhe më lirë sesa çmimi i stampuar në biletë. Tashmë në treg janë afro 14 mijë bileta dhe duket se të gjithë do të mbeten të kënaqur.
Të shtypura në Itali, të pafalsifikueshme
Në një takim që është zhvilluar dje në zyrat e klubit shkodran mes përfaqësuesve të këtij klubi, atyre të pushtetit lokal, policisë dhe PAMECA s, është mësuar edhe një fakt nga ana e presidentit të Vllaznisë, Valter Fushaj. Biletat e ndeshjes Shqipëri Slloveni janë shtypur në Itali dhe ato janë të pafalsifikueshme. Këtij fakti i janë druajtur shumë edhe forcat e rendit, sepse, sipas tyre, do të ishte problem nëse në stadium do të hynin më shumë njerëz sesa kapaciteti i tij. Por Fushaj, duke folur edhe në emër të FSHF-së, si bashkorganizator i këtij aktiviteti, ka thënë se kjo nuk ka asnjë mundësi të ndodhë. "Me shitjen e 14 mijë biletave nuk ka sesi të ketë njerëz të tjerë që do të kërkojnë të hyjnë në stadium, përderisa janë po aq bileta të shtypura," ka thënë ai.
Sllovenët tek "Europa", kuqezinjtë te "Colosseu"
Ndryshe nga katër vjet më parë, kur ishte shumë problem akomodimi i ekipit kombëtar rus në Shkodër, si pasojë e mungesës së infrastrukturës së duhur hoteliere në këtë qytet, kësaj here gjërat kanë ndryshuar për mirë. Inaugurimi dhe fillimi nga puna vetëm para pak muajve i Grand Hotel "Europa" e ka zgjidhur edhe këtë problem. Një hotel luksoz në të gjitha drejtimet dhe për rrjedhojë sllovenët do të akomodohen mbrëmjen e së premtes në këtë ndërtesë shumëkatëshe. Ndërkohë, kuqezinjtë do të vendosen pak metra më larg, pikërisht tek "Colosseu", pronë e presidentit të Vllaznisë Valter Fushaj. Personeli i këtij hoteli ka ditë që ka nisur përgatitjet për t'i pritur sa më mirë kuqezinjtë. Madje, pikërisht për këtë arsye, edhe trajneri i ekipit shkodran, Mirel Josa, i cili është i akomoduar gjatë gjithë kohës në këtë hotel, është detyruar të ndërrojë vend. Arsyeja është sepse ai ka qëndruar në dhomën më të mirë të hotelit, që nga personeli i tij quhet "dhoma e Limprehtit", ngaqë aty vendosej ish ambasadori amerikan, sa herë që vizitonte Shkodrën. Por vetë Josa me të qeshur i është drejtuar personelit të hotelit se "meqë Bariçi nuk vjen dhe kjo dhomë duhej vënë në dispozicion të trajnerit të kombëtares, atëherë unë nuk po e liroj atë."
Siguria e ndeshjes, merret masat e duhura
Paraditen e djeshme, në ambientet e stadiumit është zhvilluar një takim i zgjeruar, në të cilin kanë marrë pjesë pjesëtarë të misionit policor ndërkombëtar PAMECA, të drejtorisë të policisë së Shkodrës, pjesëtarë të Prefekturës dhe Bashkisë si dhe dy drejtuesit e klubit shkodran, Fushaj e Medja. Arsyeja e këtij takimi, siç është shpjeguar nga të pranishmit, ka qenë angazhimi i të gjitha palëve për ta nxjerrë sa më mirë këtë aktivitet të rëndësishëm. Për më tepër që në Shkodër ka ardhur posaçërisht edhe holandezi Dakenberg, i cili ka punuar prej vitesh me UEFA-an për problemet e eliminimit të dhunës në stadiume. Shkodranët si palë organizatore e kësaj ndeshjeje zyrtare kanë shpjeguar masat e marra prej tyre për shkuarjen sa më mirë të ndeshjes, ndërkohë që edhe drejtori i policisë së Shkodrës, Premçi, ka theksuar faktin se në këtë qytet ndeshjet e futbollit kanë qenë gjithnjë shembull, duke mos pasur asnjëherë probleme me dhunën e fenomene të tilla të ngjashme.
"Tifozët Kuqezi", festa e 3-vjetorit në Shkodër
Janë grupimi më i zjarrtë i tifozave të kombëtares shqiptare. Mbase ngaqë edhe emërtimi i këtij grupimi ka ngjyrat e flamurit shqiptar. Do të lindte 3 vjet më parë dhe tashmë ata janë shndërruar në pjesë të rëndësishme të këtij ekipi. Ata janë kudo, të zjarrtë dhe nacionalistë. Tashmë 3 vjet më vonë ata e kanë krijuar një emër, natyrisht të mirë dhe prandaj vlerësohen nga të gjithë. Për gjithë këto arsye drejtuesit e "Tifozët Kuqezi" kanë shfrytëzuar ndeshjen me Slloveninë për të festuar 3-vjetorin e krijimit të tyre. Një festë që do të organizohet pikërisht në Shkodër sonte, në orën 18.00. Eshtë zgjedhur edhe vendi që do të jenë ambientet e Hotel Turizmit "Rozafa", në një koktej ku do të jenë të ftuar edhe drejtuesit e federatës, stafi drejtues dhe futbollistë të ekipit tonë përfaqësues.
Marre nga gazeta
Sporti Shqiptar
