Kualifikimi me Sligon është harruar nga kuqeblutë dhe gjithçka ka filluar të mendohet vetëm për takimin me Rapidin. Mbrojtësi kuksian, Rrahman Hallaçi, mendon se asgjë nuk është e pamundur kundër austriakëve. I ardhur te Vllaznia pak javë më parë, Hallaçi bëri një prezantim të mirë në dy ndeshjet ndaj irlandezëve në turin e parë dhe këtë herë beson se shkodranët do të kërkojnë më shumë nga çfarë të tjerët presin nga ky ekip. “Natyrisht që përballja me Rapidin e Vjenës është shumë e vështirë, sepse dihet që është një kundërshtar i fortë për ta eliminuar. Gjithsesi, ne do të luajmë shanset tona dhe do t’i bëjmë hyzmetin ndeshjes. Asnjëherë në futboll nuk ka gjëra të paarritshme. Për këtë duhet të provojmë dhe të bëjmë maksimumin që në takimin e parë”, ka thënë mbrojtësi i kuqebluve. Në fund, ai vlerëson edhe punën që është bërë deri më tani nga ekipi kuqeblu. “Ka qenë një kualifikim tërësisht i arritur me vështirësi, por shumë i merituar kundër Sligos. Në të dyja takimet skuadra jonë ka luajtur mjaft e mobilizuar, duke dhënë maksimumin në fushë. Në fund kemi gëzuar vetveten dhe të gjithë tifozerinë shkodrane për kualifikimin. Tani shpresojmë që ta bëjmë një gjë të tillë edhe ndaj Rapidit.”