3′-Skemë e shkodranëve nga goditja standarde dhe Liçi peshkon Dhëmbin në zonë, i cili shërben saktë për Sinanin, por në momentin e fundit kapiteni Pisha ndërhyn duke qenë deciziv, pasi numri 9 i Vllaznisë ishte pranë golit.
15′- Allmuça merr një pasim të shkurtër nga goditja e këndit dhe godet fort në hyrje të zonës, në pozicion disi të prirët; aty mbrojtësi kuqeblu Smajlaj është i pafat tek sa devijon topin që përfundon në rrjetë. 1-0 për vendasit.
18′- Petriçeviç me një inkursion personal futet në zonë dhe godet me të majtën, por Grima është i sigurt në pritjen e tij.
19′- Beqiri brenda zonës godet me kokë, por topi kalon afër shtyllës së djathtë pingule të Kotorrit.
22′- Sërish shkodranët kapin në befasi mbrotjen blu nga goditja standarde dhe Dhëmbi merr një top të bukur në zonë, rrotullohet, por edhe njëherë në momentin e fundit kapiteni Pisha largon rrezikun nga porta e tij.
31′- Nallbani me të majtën, por pret portieri Kotorri.
40′- Haliloviç nga jashtë zone godet fuqishëm dhe topi kalon ngjitur me shtyllën e djathtë pingule të portës së mbrojtur nga Grima.
41′- Dhëmbi në zonë godet fluturimthi, por jashtë.
42′- Plaku kalon Grimën, por ndërhyn Beqiri dhe largon rrezikun.
43′- Petriçeviç provon me të majtën, por sërish pret Grima.
44′- Nikoliç shërben bukur për Plakun nga e majta, por sulmuesit me numër 11 i mungon kontakti final me topin pak metra larg portës.
45′- Boadu, pas një rrëmuje, godet brenda në zonë, por jashtë.
50′- Allmuça godet fuqishëm nga distanca, por grushton Grima.
56′- Boadu me një të djathtë të bukur nga jashtë zone është fare pranë golit, por iniciativa e afrikanit përfundon jashtë.
59′- Aksion model i shkodranëve, i cili starton nga këmbët e kapitenit Sinani, që shërben saktë me të djathtën për Boadu. Krosimi i numrit 11 të shkodranëve është i saktë dhe aty Dhëmbi nuk fal, duke e dërguar topin me kokë në rrjetë. 1-1.
62′- Jusufi tenton me një gjuajtje ne formë krosimi, por pret pa probleme Grima.
70′- Boadu godet sërish brenda zone, por nuk gjen kuadratin blu.
85′- Nikoliç bën 2 tentativa brenda në zonë, por nuk shënon.
90′- Kundërsulm i Vllaznisë dhe Boadu i lirë në zonë nuk arrin të shënojë, pasi gjuajtja e tij përfundon në traversë.

Dinamo ndalet sërish në kryeqytet. Kësaj herë ka qenë një skuadër e mirëvendosur në fushën e blertë si Vllaznia e Shkodrës, e cila mund të kishte arritur edhe fitoren në fundit e takimit. Në fillim Dinamo shfaqet pak sa e ndryshuar në formacionin e saj për vetë zgjedhjet e teknikut Daliç. Aktivizimi i Haliloviçit në krahun e djathtë në vend të Sinës dhe ai i Jusufit, i cili vetëm me një ditë stërvitje pas grumbullimit në kombëtaren e moshave kroate, nuk mund të sillte ndonjë “risi” në lojën e kampionëve. Ndërkohë që shkodranët zbrisnin në fushën e blertë me formacionin e tyre më të mirë. Ndeshja e ditës së djeshme në “Selman Stërmasi” ka qenë tepër e synuar nga të dyja skuadrat dhe ka dhuruar emocione për të pranishmit në stadium. Raste të shumta në të dyja portat respektive, sidomos në fundin e pjesës së parë, kanë gjallëruar 90′ e përballjes Dinamo-Vllaznia. Por në fund, të dyja skuadrat nuk kanë marrë më shumë se 1 pikë në barazimin 1-1. Në fillim vendasit do të gjenin rrugën e rrjetës në minutën e 15-të me anë të një autogoli të Smajlit, pas një gjutje të Allmuçës. Ndërkohë që shkodranët reagojnë me lojën e tyre sulmuese. Dallon kapiteni Sinani dhe mesfushori Dhëmbi. Në fund të pjesës së parë shkodranët sigurojnë raste të pastra shënimi, por në disa momente pasaktësia e tyre dhe në disa të tjera merita e mbrotjes dinamovite, kanë bërë që skuadrat të shkojnë në dhomat e zhveshjes me avantazhin 1-0 të Dinamos në pjesën e parë.
Në pjesën e dytë shkodranët e nisin me një zëvëndësim, ku Beqiri ia lë vendin Doçit që vendoset në krahun e majtë të mbrojtjes, ndërkohë që Berisha rreshtohet në qendër të mbrotjes përkrahë kroatit Bashiç. Pjesa e dytë është më e mirë për fituesit e kupës një sezon më parë. Aksion pas aksioni kuqeblutë të “nxitur” dhe nga trajneri i tyre Canaj janë më të rrezikshëm, ndërkohë që Dinamo “çalon” në lojën e krahut të djathtë, ku mungesa e pashpjegueshme e mbrojtësit Sina, ka krijuar një “hendek” në prapavijën blu. Gjithashtu dhe loja sulmuese e bluve nuk është ajo më e mira, kur Petriçeviç shpeshherë triblon vetveten dhe dorëzon topin tek kundërshtarët e tij, ndërkohë që Plaku i ardhur nga një gjendje gripale nuk është në ditën e tij më të mirë. Vllaznia me anë të një aksioni model arrin të barazojë rezultatin në 1-1, ku Dhëmbi shënon brenda zone me kokë. Dinamo përpiqet të kalojë sërish në avantazh, por loja e saj është tepër e diktuar nga kundërshtarët shkodranë, të cilët në fundin e takimit marrin në dorë frenat e lojës, duke i’u afruar dhe golit të dytë në minutat shtësë, kr Boadu i vetëm me Kotorrin ka goditur traversën. Dinamo vazhdon të kalojë një “ngërç” në lojën e saj edhe pas fitores ndaj Lushnjës një javë më parë në transfertë. Ky është barazimi i tretë për kampionët në fushën e tyre, pas atyre të arritur më parë ndaj Teutës dhe Elbasanit. Në javën e shtatë kampionët do të përballen në derbin e kryeqytetit ndaj Tiranës udhëheqëse të superligës.