Valter Fushaj, presidenti i Vllaznisë, është shprehur mjaft i kënaqur me kundërshtarin e turit të parë eliminator. Kreu i klubit shkodran nuk e kishte fshehur dëshirën për t‘u përballur me një skuadër sllovene dhe shorti duket se e ka dëgjuar. "Nuk kam përse të mos jem i kënaqur, pasi përpara shortit kisha thënë se do të më pëlqente të luaja kundër një ekipi slloven", deklaroi Fushaj, pasi mësoi emrin e rivalit. Gjithsesi, njëshi i kuqebluve nuk pretendon se Koper është një skuadër lehtësisht e kalueshme edhe pse pranon se shpresat e Vllaznisë për të kaluar në turin e dytë janë të mëdha. "Kemi shpresa të kualifikohemi në turin e dytë, pasi Vllaznia gëzon një eksperiencë të madhe në Kupat e Evropës, theksoi ai. Nuk do të thosha se shorti ishte i thjeshtë për faktin që ndeshemi me Koperin, por do të thosha se duke vlerësuar edhe kundërshtarët e tjerë të vazos së parë, ky short është i pranueshëm. Tashmë detyra jonë është që të përgatitemi me seriozitet dhe të luajmë duke dhënë maksimumin".