Marko Cetkoviç, pasditen e djeshme ka firmosur në Bosnjë, me ekipin e Sarajevës, ndonëse pak ditë më pare, gjatë vizitës në Shkodër, u kishte premtuar se do të firmoste me Vllazninë. Një tjetër futbollist i planifikuar të jetë pjesë e skuadrës kuqeblu në sezonin e ri, mbrojtësi beratas, Polizoi Arbri, ka zgjedhur ekipin e Kukësit për vazhdimin e karrierës.
Esin Hakaj do të jetë pjesë e Partizanit sezonin e ardhshëm, teksa lajmin e ka bërë të ditur klubi shkodran me anë një njoftimi në faqen zyrtare në rrjetin social “Facebook”. Kjo lëvizje është kryer pas ngulmimit të vetë lojtarit për t’u larguar, ndërkohë Partizani ka paguar për kartonin e lojtarit, si dhe ne rast shitjeje Vllaznia do të përfitojë 50% të vlerës së rishitjes së kartonit të mbrojtësit 19 vjeçar.
Burime pranë lojtarit bëjnë të ditur se brenda pak ditësh ai mund të lërë Shkodrën, por ende nuk dihet saktësisht destinacioni. Tashmë në skenë ka dalë edhe një tjetër variant për transferimin e tij pikërisht në Hollandë. Gjithsesi, janë menaxherët, ata që po merren me këtë çështje.
Vllaznia po vëzhgon tregun për të gjetur një portier për sezonin e ri futbollistik, dhe emri i parë i dalë në skenë është malazezi Jasmin Agoviç.
Në zyrat e klubit dje kanë qenë të pranishëm dy mbrojtësit, Stefan Cicmil dhe Endri Vrapi. Administratori Gjyrezi mësohet të ketë dëgjuar për kërkesat financiare të tyre Këto bisedime, që drejtuesit e klubit kanë nisur, kanë të bëjnë me zbatimin e një liste, që trajneri Cungu ka bërë dhe prandaj po mundohen që ajo të zbatohet.
Në këtë takim do të mësohet përfundimisht e ardhmja e trajnerit Cungu, teksa ai pritet t'i thotë "po" ofertës së drejuesve të klubit, për ta vazhduar projektin që ka nisur. Të gjitha financat, të cilat duhen për këtë sezon, do të përballohen vetëm nga Bashkia e Shkodrës. Të paktën kështu është deri më tani, sepse rrugës mund të ketë edhe zhvillime të tjera.
